Evrópskt átak gegn leghálskrabbameini !

Evrópuvika gegn leghálskrabbameini verður 20.-26. janúar. Hér á landi verða seld sérstök barmmerki, svonefnd vísdómsperla, til stuðnings baráttunni. Lyfja sér um söluna fyrir Krabbameinsfélagið. Til að gera konum auðveldara að mæta í leghálskrabbameinsskoðun verður Leitarstöð Krabbameinsfélagsins í Skógarhlíð 8 opin lengur en venjulega miðvikudagana 23. og 30. janúar. Hægt er að panta tíma í síma 540 1919.

Sérstök ástæða er til að hvetja konur til að mæta reglulega, ekki síst á aldrinum frá 20 til 30 ára. Þessa sömu daga verður einnig opið í Ráðgjafarþjónustu Krabbameinsfélagsins til kl. 19. Ráðgjafarþjónustan er ætluð þeim sem greinast með krabbamein og aðstandendum þeirra. Boðið er upp á faglega ráðgjöf, hagnýtar upplýsingar og fleira.

Þá hafa Evrópusamtök um leghálskrabbamein (ECCA, European Cervical Cancer Association) hafið baráttu fyrir því að allar evrópskar konur njóti sama réttar til bestu fáanlegra forvarna gegn þessum sjúkdómi. Hvatt er til þess að Evrópuþingið, framkvæmdastjórn Evrópusambandsins og ríkisstjórnir allra landa í Evrópu veiti konum þennan rétt. Hægt er að skrifa undir áskorun á vefsíðu samtakanna. Slóðin er http://www.cervicalcancerpetition.eu/

Nú eru undirskriftirnar orðnar yfir sjötíu þúsund, þar af meira en sex þúsund frá Íslandi. Aðeins tvö önnur lönd eru með meiri fjölda, en að teknu tilliti til íbúafjölda eru Íslendingar langefstir.
Leghálskrabbamein er næstalgengasta krabbamein meðal kvenna ef litið er til heimsins alls. Á hverju ári greinast í Evrópu um 50.000 konur og um 25.000 deyja af völdum þessa sjúkdóms. Hér á landi er dánartíðnin hvað lægst á heimsvísu, vegna skipulegrar leitar. Aðrar þjóðir, jafnvel innan Evrópu, geta ekki státað af slíkum árangri.

Fræðsluefni:■ Velkomin í leitarstöðina■ Leghálsskoðun■ Veirur valda krabbameini í leghálsi■ Bóluefni við leghálskrabbameini - kostir og gallar